நிழலிலிருந்து வடியும் குருதி

நெருப்பைத் தின்னுவது
அப்படியொன்றும் கடினமானதல்ல
முள்ளின் மேற் தூங்குவது சிரமமானதுமல்ல

குழியில் வீழ்த்தப்படுவது
இருளிற் தள்ளப்படுவது
வரிசையிலிருந்து நீக்கிவிடுவது
எல்லாமே மிகச் சாதாரண விசயங்கள்.

பாம்புகள், நரிகள், ஓநாய்கள்,
முதலைகள், விலாங்குகள், கழுகுகளோடு
வாழ்வது அதிசயமானதுமல்ல.

கண்ணீருடனும் பசியுடனும் இருப்பது
துக்கத்துக்குரியதோ அவமானத்துக்குரியதோ அல்ல
அது மகத்தானதுமல்ல.

அன்போடிருத்தல்
கருணை மிகக் கொண்ட காதல்
ஒளிரும் உண்மையோடு வசமாகுதல்
அறத்தின் முன்னே தன்னை நிறுத்துதல்
என்ற ஆயிரங்காலத்துப் பயிர்களை
ஓரிரவில்
அல்லது பட்டப்பகலில் மேய்வதொன்றும் புதிதுமல்ல

மனிதர்கள் யார்?
அவர்கள் எவ்வாறிருப்பர்? என்றறிய முடியாதிருப்பதும்
எப்போதெல்லாம் ஏதோவொன்றாகி
அல்லது வேறு வேறாகி
வர்ணங்கள் பலவாகி தன்னைச் சூழ்ந்தொரு விம்பப்படை அமைப்பதும்
பிறகொரு கால்,
தன்னை மறைத்து பிறரைக் காட்டிக் கொடுப்பதுவும்
இன்னொரு வேளை
பிறரை மறைத்துத் தன்னைச் சிகரமாக்குவதும்
எப்படியெல்லாம் நிகழ்கின்றன
என்ற குழப்பங்களை விடவும்.

மனிதர்களே உருவாக்கிய விதிகளையும் முறைகளையும்
மனிதர்களே மீறுவதும்
மனிதர்களே ஆக்கிய ஒழுங்கை
மனிதர்களே மீறிச் செல்வதையும்

அறியவே முடியாமல் தவிப்பதை விடவும்.

நெருப்பைத் தின்னுவது
அப்படியொன்றும் கடினமானதல்ல
முள்ளின் மேற் தூங்குவது சிரமமானதுமல்ல

குழியில் வீழ்த்தப்படுவது
இருளிற் தள்ளப்படுவது
வரிசையிலிருந்து நீக்கிவிடுவது
எல்லாமே மிகச் சாதாரண விசயங்கள்.

பாம்புகள், நரிகள், ஓநாய்கள்,
முதலைகள், விலாங்குகள், கழுகுகளோடு
வாழ்வதெல்லாம் அதிசயமானதுமல்ல.

மேலும்

ஒரு கொலையை நிகழ்த்துவதும்
ஒரு கொலையை மன்னிப்பதும் பெரிதுமல்ல.

00