'உன்னுடைய இதயத்தில்
எதை நிரப்பி வைத்திருக்கிறாய்?'
என்று கேட்டாள் அவள்.
'பூக்களும் வாசனையுமெ'ன்றான் அவன்
'கனியும் சுவையும் வேண்டுமெ'ன்றாள் அவள்
'உன்னுடைய கண்களில்
எதை நீ வைத்திருக்கிறாய்?' என்றாள் அவள்
'உன் கண்களையும்
உன்னுடைய ஞாபகங்களையும்' என்றான் அவன்
'எதிர்காலத்தையும் வசந்தத்தையுமே
விரும்புகிறேன்' என்றாள் அவள்
'உன்னுடைய கைகளில்
எதைச் சேமித்திருக்கிறாய்?' என்று கேட்டாள் அவள்
'உன்னையும் உன் அழகையும்' என்றான் அவன்
'காலத்தையும் பாதைகளையுமே
விரும்புகிறேன்' என்றாள் அவள்
'உன்னுடைய பயணம் எங்கே?' என்றாள் அவள்
'உன்னிடம், உன் இதயத்திடம்' என்றான் அவன்
'வெளிகளிலும் பறவைகளிலும்
நானிருக்கிறேன்' என்றாள் அவள்.
'உன்னுடைய பாடல்கள் யாதாயுள்ளன?' என்று கேட்டாள் அவள்
'உன்பெயராகவும் அதன் இசையாகவும் இருக்கின்றன'
என்றான் அவன்
'காற்றின் குரலையும்
காலத்தின் மொழியையும் விரும்புகின்றேன்'
என்றாள் அவள்
மேலும்
'அழும் குழந்தையையும்
கண்ணீரோடுள்ள தாயையும் ஆதரிக்கிறேன்' என்றாள்
'உன்னுடைய நிலப்பரப்பெது?' வென்றாள் அவள்
'புல்வெளியும் மலர்த்தோட்டமும்' என்றான் அவன்
'நீரூறும் சுனையும்
அடர் மரங்களுமே தனது நிலப்பரப்பெ'ன்றாள் அவள்.
'உனது கனவுகள் எங்கே? யென்றாள் அவள்
'புல்வெளியில்
பனித்துளி மீதிலே' என்றான் அவன்.
'ஆற்றினோரமும் விளையும் வயலும்
எனது இதயமென்றாள்' அவள்
பூக்களை எடுத்துச் சென்ற அவனிடம்
அவள் கொடுத்தாள்
கை நிறையத்தானியங்கள்.
00
No comments:
Post a Comment