வரவேற்பு

பார்க்கிறேன்
இலைகளால் கம்பளம் விரித்து
காத்திருக்கின்றன எல்லா மரங்களும்
பறவைகளுக்காக
எப்போதும்

பறவைகள் வந்தமர
எல்லாக் கிளைகளும்
நெகிழ்ந்து கொடுக்கும்
காதலும் நட்பும் அன்பும் கருணையும் பெருக.
மலர்களும்
கனிகளும் கூட
பறவைகளுக்காகவே.

நிலத்துக்கும் ஆகாயத்துக்குமிடையில்
அந்தர வெளியில் நீந்திவரும்
பறவைகளை வரவேற்றுக் கொண்டிருக்கும்
மரங்களுக்குத் தெரியுமா
எந்தப் பறவை
எப்போது வந்து
எங்கே அமருமென்று?

ஆனாலுமவை காத்திருக்கின்றன பறவைகளுக்காக

பறவைகளும் அறியுமா
எந்த மரத்தில்
எங்கே
எப்போது அமருவதென்று?

ஆனாலுமொன்று
மூப்பென்றும் இளமையென்றும்
பார்த்து அமர்வதில்லை
எந்த மரத்திலும் எந்தப் பறவையும்.

எந்தப் பறவை வந்தாலென்ன
விலகிச் சென்றாலென்ன
பறவைகளுக்காகவே காத்திருக்கின்றன
இலைக்கம்பளம் விரித்து
ஒவ்வொரு மரமும்
இரவும் பகலும்...

00